සිහිල් දිය වැල් සිනාසී
ගී ගයා දුර ගලා යයි
නිදති තුරුපත් මේ රැයේ
සුලං රැලි මත නැලවිලා

තරු පියුම් පෙති ඈහැරිලා
සිහිනයක මුතු විසිරිලා
නිදයි ඔබ නගමින් සිනා
දෙතොල් මල්පෙති විහිදලා

ජීවිතේ සුවඳයි මගේ
මලක රොන් සුණු තැවරිලා
සිතක සිතිවිලි ඉතිරිලා
ගලයි කවි පද වී ගලා

ආදරේ හැඟුමක් නොවේ
මැකෙන පිණිබිඳුවක් නොවේ
කාලයේ සළුවෙන් වැසී
සැඟව යන මැණිකක් නොවේ

සඳ දිය කඳුලැලි

වෙසක් සඳ අඩවන්ව සිඳී ගිය අහස් කුස

පොසොන් සඳවත පිපෙයි පිපෙන නෙළුමක් සේම

පියුම් පත් පත් සිඳී විසිර යයි මලසුනේ

සියුම් සුවඳක සුවඳ නෙතු පියයි නිසසලව

සඳම මුත් සඳ නොවෙයි නැගෙන කඳුලැලි කියයි

පිපෙන මුත් එළිය දී අඳුර ඈතට නොයයි

ගලන සඳ කඳුළු දිය බිඳු බිඳුව දිලිසිලා

පිරිමදියි හෙමි හෙමින් මිලින පියුමේ සුවඳ

සුවඳ මටයි මගෙ සඳටයි

මහ පොලොව ජනිතව
නෙතු පියන් සැලූ දින
හිස්ම හිස් මුඩු බිමක
පා නගා ඇවිද ගිය
පියවරක් පියවරක්
මා දෙපා ලඟ රැඳුණු
සිඟිති පියවර ලකුණු
මතින් මම පා නගමි
නොනවතිමි නොනවතිම්


කාලයේ පියාපත් යට
තුරුළු වී උණුසුමට ගුලිවෙන
මතක මල් පෙති උඩින්
හොරෙන් හොරෙන් පා නගයි සිතුවිලි


අතීතයක්
අනාගතයක් නොමැති
අවකාශයක රැඳවුනු
එකම එක මොහොතක
සුවඳ ඉහිරී ගලයි
කල්පාන්තරයක් දිගට


ජීවිතය
සුවඳයි
මටයි මගෙ සඳටයි....!

හඳට උඩින් පියා සලන කිරි කොක්කුන්ටයි

හිතට සුසුම් උණුහුම දෙන සුවඳ අරන් වරෙල්ලා
හඳට උඩින් පියාඹලා කිරි පෑ වී වරෙල්ලා


මදටිය ඈස් අගට සිහිල් කඳුළු අරන් වරෙල්ලා
ග​ඟේ ගිහින් ගලේ හැපුණු කිරි මුට්ටිය ගෙනෙල්ලා


අනේ අපොයි කියා ගිහින් හිනා හලන් බකමූණෝ
මගෙයි මගෙයි මගෙයි කියා අඬා වැටෙන් උල ලේනෝ


කීචි බීචි කතා කියන බටිති පැටවුනේ ඈවිදින්
කොඳුර කොඳුර හිනා වෙයව් මගේ ලඟින් දුව පනිමින්
 
මතක පොකුරු පොකුරු පොකුරු මල් පොකුරක රඳවලා
හිතක හිතක සුවඳ බිංදු හිතක හිතක තවරලා


හඳට උඩින් පියාඹලා පියාඹලා වරෙල්ලා
හිතට යටින් හොරෙන් හොරෙන් හිනාවෙලා ඉඳිල්ලා

සිඹිමි මම මගේ සඳ

හිනාවක ඉනාවක් හිනාවෙන වෙලාවක
හිතේ රැඳි සුවඳ මල් කිතිකැවෙන සැඳෑවක
ඈවිත් මා ලඟට නුඹ දැවටෙමින් මා ලඟම
දෙනෙත් පොපියා බලයි සිඹින තුරු මගේ සඳ

නවාගෙන බට පඳුරු සුළඟ දඟලයි දුවයි
මගේ හිත නැවතිලා හැලෙන මල් පෙති දකියි
අනේ මගෙ සරා සඳ මුහුණ ඔසොවා මදෙස
බලාගෙන ඉන්නවා සිඹින තුරු මුදු නළල

අත පපා ලදරුවෝ සිනා සෙති නුඹ සමග
සඳ එළිය මැද රඟති චන්ද කින්නර යුවල
සිඹිමි මම නුඹෙ නළල සිඹිමි මම ආයෙමත්
ආදරේ කියන්නේ නිම නොවන සිහිනයක්

ඉකි බිඳින සඳ බිනර

ඉකිගසන බිනර සඳ
මුතු කඳුළු හෙලන සඳ
සුදු තිමිර සේල හැඳ
කඳු සිකර නිදති අඳ

රිදවන අඩසඳ

සිදුරු කරන්නද මහද
බලා ඉන්නේ නුඹ
උලුක් කරගෙන
උල් දෑ කැත්ත අද..?